Tsunami politik di Sarawak enda ulih tagang: Anwar Ibrahim

Monday, December 29, 2008

Tsunami politik di Sarawak enda ulih tagang: Anwar Ibrahim
ik di MIRI: Ketuai Penyakal Dato Seri Anwar Ibrahim madah Pakatan Rakyat (PR) ngembuan pengarap ulih numbuhka Perintah Menua dalam pengawa bepilih dudi hari tu ila laban rayat mayuh ba pun menua din balat endar udah tetengukka ubah besai di Sarawak.

Iya mansutka jaku nya ba pengerami makai lemai Parti Keadilan Rakyat (PKR) ke digulu semak bisi 3,000 iku mensia mayuh ari pupu raban bansa ba Eastwood Golf and Country Club hari Minggu.

Lebuh ditanya pasal bakani penyakal ke betuaika iya ulih ngalahka perintah BN Menua, udah bekau sida nadai engekeretik agi pasal semaya enggau perambu deka nukar perintah besai kena 16 September (916) tu tadi munyi ke udah balat kaung-kaung dipadah dulu, iya nyaut: “Kami enggau naka ulih nyapai nya; 916 enda nyadi laban sida enda ngasuh (enda ngemendarka) kami betemu enggau sida, tang kami bisi jalai tauka pilih bukai.”
Bala sida bisi kena emba sereta dikemaluka, ku iya.

Anwar madah bala PR nya besai amat pengarap ulih menang ba atur bepilih dudi ila, laban rayat Sarawak nyau majak tuai runding sereta mereti agi dalam politik ka tambah chukup besai agi pengarap ngagai PKR enggau PR merintah Menua tu.

“Kami nemu nama utai ke nyadi ba rayat di pun menua din,” ku iya nyaut tanya pasal sekalika iya berunding chukup andal bepanggai ba gaya penyampal mensia mayuh ke datai ngulu pengerami makai lemai ba Sibu enggau Miri.

Dalam jaku iya dulu ari tu, Anwar madah PR nemu rayat mayuh enda ulih dikemula (perintah) belama, nyengkaum bala bansa Dayak ke keran deka nyaga kuasa ngempu tanah sida lalu madah PR enggau naka ulih deka ngetanka kuasa empu tanah nya ngena chara ke patut, nadai bechiping.

“Enggau berekat ari Petara, kami meh merintah Sarawak dudi ila,” ku iya sereta diterima mensia mayuh enggau tempap jari.

Dalam jaku iya dulu ari tu, bekau sapit perdana menteri sereta menteri wang ke betukar nyadi ketuai penyakal nya madah, PR deka ngubah sekeda undang-undang pasal kuasa empu tanah pesaka bumiputera ke diatu ngujungka mayuh bumiputera tingkil kuasa ngempu tanah kuasa nya ke endang dipungkal, diperimba bala aki ini sida kenyau ari jeman kelia.

Anwar mega besemaya deka ‘ngusak parlimen’ lebuh iya mantaika isu kuasa ngempu tanah pesaka (NCR) ke udah kusut kena kachau orang di Sibuti munyi ke dikutuk bala raban bansa Kedayan dia lebuh iya nemuai ngabas sida hari Minggu tu tadi.

Anwar mega madah, kunsil nengeri ke ngaga adat enda mujur sereta lembut dalam pengawa nyaga pengelantang pendiau orang seranta, lalu madah mayuh kes pechara NCR enda putus-putus ba kut, ngujungka nyau betaun siti kes nadai pengujung tang minta ngenataika pemerinsa enggau pengeransi ngagai rayat meda atur nya bisi bepinang benibung sereta tampak bendar sengaja bechiping.

Iya madah PR keran deka atur undang-undang ke alus sereta ngena dipejalaika, lalu ukai adat dalam kampung dalam di Malaysia, ke alai orang kaya aja ke dikemelu sereta dijaga, dilindung tang rayat mayuh diau merinsa.

“Patut bisi siti set adat tauka undang-undang aja ungkup semua, ke alai Perdana Menteri, Kepala Menteri sama ngena iya bala orang berikan enggau orang bumai, lalu ngujungka atur nadai bechiping,” ku iya.

Ngenang pasal jaku orang ke ngumbai iya mai pengachau ngagai menua Sarawak senentang isu tanah pesaka sida, iya nyaut: “Kami meri awak pekara nya diputarka lalu Nicholas Bawin ba kongres PKR udah minta semua nyaup bala Iban di Sarawak nerabai sereta nyaga kuasa empu tanah pesaka sida sereta mega nyaga pemanah enggau peninggi nama bansa sida dalam pengawa betapi enggau chabar isu tanah tu.”

Lebuh ngenang pasal BN ke madah PR ke nyadi penyakal semina bejanji puang aja sereta semina bemimpi, Anwar madah, PR diatu merintah lima bengkah menua dalam Malaysia, sereta madah sida deka ngulihka Sarawak nyadi menua lumur enam baruh pegai sida ba pengawa bepilih dudi ila, sereta madah BN enggau Umno udah salah pelaba dalam pengawa bepilih bulan Mac taun tu tadi.

Anwar madah ba lima iti Menua ke dipegai perintah PR – Kelantan, Kedah, Pulau Pinang, Perak enggau Selangor udah ngayanka sida gawaka rayat, lalu ukai gawaka ketuai parti tauka perintah, ari sekeda atur ke udah dipejalai sida nyengkaum bekal ai pechuma ngagai rayat, saup automatik pengawa rabat (RM2,500), bantu RM1,000 masuk universiti ungkup nembiak ari ruang bilik seranta, meri pala tanah, bantu ngagai semua bansa sekula ngena jalai ngagih gran belanja (di Selangor) enggau mayuh agi bantu bukai ngagai rayat.

Di Perak ku iya, semua sekula diberi pala tanah magang, lalu pekara tu beduduk ari pengeran rayat ke udah meri undi sida ngagai PR.Iya madah makai suap enggau kusut ekonomi deka ngemedis nembiak bansa Malaysia, lalu pekara tu begunaka ubah ke besai di Malaysia tu.Sebedau nya, Ketuai PKR Sarawak Dominique Ng madah, PR udah sedia deka merintah Sarawak kena ngemetulka pengurang runding dalam ngagih gran ngagai sekula Cina enggau sekula mission, laban SUPP nyau bendar minta duit ari Perintah Besai dalam pekara nya.

“SUPP munyi parti Penyakal taja pan iya dalam BN,” ku Ng.Kaban Kunsil Nengeri Ngemah Aya Ragum Gabriel Adit ke mega bisi bejaku madah, parti nya deka enggau naka ulih bejalai di sekayu Sarawak kena nambah kaban baru iya sereta mupu sukung ari mensia mayuh ke deka meda menua tu berubah nuju pemanah enggau pengelantang pendiau rayat.

“Sema kejaku, kami nadai mulau tauka ngalau sebarang menua. Semua rumah deka ditiki, munyi ku jaku, lubuk dalam pan diselam, ungkap pan disagam enggaika bisi orang kena seliah,” ku Adit.Sama bisi bejaku nambun puji ngagai Anwar mega chermin pengatur pengerami nya Dr Micheal Teo Yu Kheng, ke nyadi chermin PKR Miri.

Kelimpah nya chermin DAP Miri Fong Pau Teck mega bisi bejaku sereta ngading Anwar nyadi Perdana Menteri Malaysia udah tu ila.Pengerami nya mega digulu ketuai PKR Sabah Datuk Dr Jeffry Kitingan, penyanding penemu Dato Sri Hafsah Harun, presiden SNAP Edwin Dundang, bekau kaban parlimen Harrison Ngau seduai Jimmy Donald, sereta mega bekau pengari Kunsil Nengeri Telang Usan Kebing Wan sereta bala bukai.

*Nyak.. Nti ktk agik bisi ngembuan tanah Adat. Jaga Memanah, Nti bisi bala BN datai ke Rumah Panjai madah kak deka meli Tanah ktk laban deka ngemaju ke ia. tau nda ibuh.

Nemu*Sumber Borneo Post News